8/4/12

VILAMOR: CINE EN GALEGO E CONCURSO.



Esta última película de Ignacio Vilar está inspirada nunha comuna lucense dos anos setenta e amosa dúas formas de entender a vida, por unha banda, a duns mozos 'hippies' e, pola outra, a dunha sociedade que está a dar os seus primeiros pasos en democracia.
En “Vilamor” a acción transcorre en 1976 cando Breixo, un rapaz seminarista dunha vila das montañas de Lugo, se atopa cunha comuna na aldea de Vilamor. Seducido pola idea dun estilo de vida alternativo, decide axudar o grupo que acaba de chegar para recuperar a aldea, fronte a veciños que parecen non compartir este soño de liberdade.


O pasado 30 de marzo estreouse   Vilamor, película galega e en galego, que pasará polas salas de cinema de todo o país. A partir do 3 de maio estará na Coruña nos Filmax . 
Para aproveitar o talento, imaxinación e creatividade do alumnado e para potenciar a asistencia da xente ás salas de cine  e fomentar a educación audiovisual argallouse o concurso "Tes que vela". Le aquí as bases:
Bases
•         Creación dun vídeo co lema “Tes que vela” (que debe aparecer gráfica ou verbalmente)
•         Duración: máximo 30 segundos.
•         Participantes: máximo 13 persoas por vídeo.
•         Número máximo de vídeos por participante: 3
•         Premio: unha fin de semana nos Ancares
•         Xurado: o director e os actores principais de Vilamor
Como participar
•         Os participantes terán que colgar un vídeo en Youtube co título: “Vilamor, a película. Tés que vela + título da vosa creación”.
•         Entre os vídeos máis difundidos elixiranse 5 finalistas. O xurado reservarase a posibilidade de destacar algún outro vídeo que non teña tanta difusión pero que destaque pola súa calidade ou orixinalidade.
•         De entre eses vídeos finalistas o xurado elixirá o vídeo gañador.
Prazo para a presentación dos vídeos
Dende o 26 de marzo ata o 30 de maio. O vídeo gañador darase a coñecer durante o mes de xuño.
Premio
Os gañadores do mellor vídeo disfrutarán dunha fin de semana nos Ancares cos protagonistas e o director de Vilamor acompañados dun tutor legal, se son menores de idade. Todos os gastos serán pagos.

1 comentario: